Camino del Salvador

Ente La Pola de Lena y Mieres, el Camino del Salvador avanza por un corredor históricu que durante sieglos xunió Asturies cola Meseta. Una etapa xacobea, cenciella y llena de memoria caminera, ideal pa descubrir la historia y el paisaxe del valle del Caudal.

Esta etapa, d’unos 16 quilómetros y dificultá baxa, ye una de les propuestes más accesibles y representatives del centru d’Asturies. El trazáu permite entender cómo la xeografía condicionó históricamente los desplazamientos, xuniendo montes y valles nun exe que coneuta l’interior peninsular con Uviéu.

El percorríu destaca pola so riqueza cultural, superponiendo diferentes dómines: dende los antiguos caminos d’orixe romanu y medieval hasta la histórica Carretera Xeneral de Castiella proyeutada por Xovellanos. Al atravesar los conceyos de L.lena y Mieres, el caminante descubre un territoriu onde conviven la tradición xacobea y la buelga de l’Asturies industrial.

Un fite fundamental ye la llocalidá d’Uxo, puntu estratéxicu onde conflúin la Vía romana de La Carisa y los ríos L.lena y Ayer pa formar el ríu Caudal. Ellí, el pelegrín alcuentra la ilesia románica de Santolaya d’Uxo, un símbolu del calter espiritual del Camín, xunto a elementos d’arquiteutura industrial como les antigües Oficines de la Sociedá Hullera Española (el Chalé de los Xeólogos), que recuerden el pasáu mineru del valle.

En definitiva, esta ruta ye perfeuta pa quien busquen caminar per un corredor que resume bona parte de la historia asturiana. Ye un viaxe tranquilu, cómodu y profundamente cultural, qu’invita a reparar el territoriu non solo como un paisaxe natural, sino como un espaciu habitáu, trabayáu y transitáu por xeneraciones de viaxeros.